High Island Reservoir

終於等到好天去行山

一直想去萬宜水庫

朝早十點起身

十點半出門到坑口食過午餐

再搭小巴到西貢

萬宜水庫分兩種行法

一種就係搭巴士到北潭涌行去萬宜水庫東壩搭的士離開

第二種就係搭的士直入東壩行返出北潭涌搭巴士返西貢

我地選擇左第二個行法

一落車就見到經典嘅條狀山形


不只係本地人連旅客都好多

我地喺東壩影左一陣相

就朝住北潭涌方向開始行


一路上都係石屎路無風景可言

直至走到西壩先見到蔚藍嘅湖景

水好清呈現漸變嘅藍綠色

離開左西壩人愈來愈少

原來大部分人都同我地行相反方向

由東壩開始大概行左三個鐘多啲

就到左鯽魚湖巴士站

好彩嘅係我地喺呢度上左車

如果再行多少少到北潭涌站上車

就會撞正一大班去燒嘢食嘅學生
個人認為今次嘅行山徑除左水庫有風景之外

沿途嘅石屎路實在唔會想行第二次

新娘潭行山徑依然喺我心目中排第一位

酥金寶

聽過朋友介紹話北角有間茶餐廳幾特別

就襯day off 去試下

間茶餐廳叫隆記

主打上面個酥金寶

另外嗌左個嘢飲幾特別叫愈飲愈鴛鴦


我覺得酥金寶味道幾好

龍蝦湯加烏冬夠用心但就無乜驚喜

反而個愈飲愈鴛鴦好有驚喜!

奶茶加咖啡冰

一開始飲係奶茶味

當冰開始溶就愈飲愈鴛鴦

個人認為呢間茶餐廳值得encore!

Zoe

一向都好鍾意Zoe嘅蛋糕

清新又唔太甜

第一次接觸係中學做暑期工上司請食

食左一次就愛上

可惜店舖唔多

希望佢會開多幾間cafe啦

Kansai Day 5 :: Osaka

2017.1.13

雖然今晚就要返香港

但我地都唔會嘥時間

一早check out直接去機場擺低行李

然後搭shuttle bus去離關西機場只係20分鐘車程嘅Rinku Premium Outlet作最後血拼

當中最推介嘅竟然係Gap

一件tshirt一百蚊港幣有找

我同妹買得最多嘅係運動衫褲

每件都係一百蚊左右

另外想要推介嘅係熱飲機

可能天氣實在太凍

而個outlet又係露天

我地幫襯得最多嘅第二位竟然係熱飲機

除左粟米湯熱咖啡都相當唔錯

第三位推介嘅係VANS

比香港平又多好多款


血拼完返機場拎左行李

就random食左個大阪燒先上機

估唔到好好食!

關西機場必食!

Kansai Day 4 :: Nara

2017.1.12

今日只有一個行程

就係去奈良

一大清早喺酒店附近食過早餐

就搭JR去奈良

一到車站已經見到好多鹿公仔

行出去經過商店街沿著指示牌就可以行到去著名有好多鹿嘅奈良公園

途中仲會經過好多寺廟


個人最鍾意春日大社

沿途有鹿之餘四周圍嘅建築好有歷史嘅味道

不過啲鹿無想像中咁得意

佢地會追住你攞食物

但一場嚟到硬係要餵一餵佢地

當日天氣好凍

餵過鹿行過春日大社都只不過係兩點幾

就沿途出返商店街食午飯

我地去左一間出名食福袋烏冬嘅餐廳

嗚呀真係好食!

咖哩好香烏冬又好滑

仲要喺咁凍嘅天氣食

感覺特別幸福

餵過鹿食過福袋烏冬

就搭返去大阪

去左梅田站嘅Grand Front Osaka商場𥚃面嘅Qu’il Fait Bon食好出名嘅果撻


好彩唔係排好耐隊

不過個撻係值嘅!

好後悔無嗌多幾個。。。
食過tea休息夠

就去道頓崛買手信


晚餐係四天王拉麵

一啲都唔特別好令人失望

食完打算返酒店之際俾我地見到激安之殿堂!

入左去就好似去左戰場一樣

買完手信出返嚟好似俾人打左一身咁

然後我地全家就拖住極其疲倦嘅軀體返酒店執行李

準備聽日行完outlet就返香港了

Kansai Day 3 :: Osaka

2017.1.11

今日嘅第一個行程係去黑門市場食早餐


黑門市場係海鮮勝地

好多遊客都會嚟食魚生同生蠔

我地就食左拖羅生蠔同燒帶子

拖羅好食過香港嘅實在太多了!

無腥味得嚟好有鮮味

唔同香港嗰啲有浸魚腥味

生蠔大大隻好好食

不過就無想像中咁抵食

燒帶子好多汁好好食!


除左海鮮亦有好多生果檔

我地就買左白色同紅色士多啤梨食

發現紅色比白色甜

但白色就香啲

四周圍行左一陣就慢慢行去道頓堀食第二餐


我最期待嘅一餐終於都嚟喇

就係我喺網上預先卜定嘅松板牛

呢間松阪牛燒肉M喺日本好多分店

午餐時間比晚餐平好多

所以我地就卜左晏就


一位操台灣腔嘅女侍應向我地介紹左牛嘅唔到部位後

我地就肥同瘦嘅部位都揀左啲嚟試

個人覺得中間肥最好食

呢一餐每人食左200幾蚊

比想像中平

可能預先喺黑門市場食左啲嘢

食完”午餐肉”之後

就行去心齋橋shopping


今日嘅重點係去左JINS佩左眼鏡

日本嘅眼鏡好好又輕又唔會跣落嚟

行到8,9點舖頭陸續閂

我地就求其入左仲開緊嘅元綠壽司食晚飯

好懷念香港執左十世嘅元綠我地竟然喺呢度食到

款式雖然唔多但勝在夠平同滿足到我地對壽司嘅慾望

食完一餐我地又好滿足咁行返酒店休息了

Kansai Day 2::Kyoto 

2017.1.10

大清早8點幾

我地就還返鎖匙

向京都站出發

由於我地夜晚會去大阪

但airbnb 間flat 又唔俾我地擺行李

所以我地決定先到京都站行李房擺低行李

夜晚去大阪嗰時先返去拎

好鍾意日本車站有咁嘅服務


我地第一站係伏見稻荷

一去到已經見到好多遊客


嚟到當然要去著名嘅千鳥居留影


嚟到無想像中咁靚

可能太多人嘅關係

不過嚟先知原來係有人捐善款出嚟就會起一條柱

所以千鳥居呢度就有咁多柱

造成一個影相熱點


下一站:清水寺

JR伏見稻荷站比我地嚟嘅時候落車嘅稻荷站遠一啲

我地離開嘅時候因爲見伏見稻荷站去清水寺嘅清水五条站較直接

所以就決定行15分鐘左右到伏見稻荷站


由清水五条站到清水寺要步行約20分鐘

可以選擇轉乘巴士到清水寺

不過我地就揀左慢慢行去清水寺順便欣賞下沿途嘅風景

一路上見到好多著和服嘅遊客


聽人講清水寺維修緊

掙扎左一陣要唔要嚟結果都係抱住好奇心嚟左

好彩都見到大部分嘅清水寺

難得嚟到世界遺產之一

心裏不禁有一絲嘅感動


喺清水寺裏面食左個好有日本風味嘅lunch

雖然睇落去好似好清淡咁但估唔到又幾好味!


離開清水寺喺手信街見到呢個丸子買左串試下

結果一食難忘 – 好好味!!!

啲汁甜甜地得嚟夾埋qq嘅丸子簡直齒甲留香

應該係第二度唔會食到呢種味道

行完手信街離開清水寺都只不過係一點幾

去到下一站嵐山都只不過係兩點幾

比我地預期嘅早

一開始仲擔心會唔會去唔到嵐山


嚟到日本一定要試下自動販賣機嘅熱飲

粟米湯、紅豆湯、咖啡、綠茶latte都好好飲!

我地每人各自買左罐嘢飲之後就行去嵐山竹林


差唔多到竹林之前見到有售賣大福同魚餅嘅攤檔

買左嚟試

點知好難食。。。

點解好多人話日本咩都好食

定我唔好彩。。。


好鍾意呢度

有大自然氣息得嚟又不失日本風格

沿途仲經過幾個寺廟

不過去完兩大寺廟嘅我地對呢度嘅寺廟又唔係好大興趣

所以去完竹林之後就直接行去渡月橋


呢度好靚好舒服

個人認為去嵐山一定要嚟渡月橋

好舒適好休閒

我比較鍾意呢度多過竹林

可能因為少啲人

行過橋影過相已經五點幾

回程嘅時候咁啱見到有巴士返京都站

就諗都唔諗直接跳左上去

一坐就坐左九個字

雖然比JR要耐

但因為難得可以坐低瞓下如果唔趕時間巴士其實好好坐


一落巴士個肚已經打緊鼓

拎行李前我地決定去拉面小路食拉面

其實拉面小路係一個商場其中一層全部都係拉麵舖嘅小街

我地求其揀左一間坐低

雖然未算得上好驚喜但係幾好食嘅兼幾抵食

醫飽個肚之後就拎行李去大阪

我地間酒店叫Lohas Hotel

服務好好

Check in後每位女客人獲贈5樣嘢包括mask同cream

房間雖然唔大但有公眾溫泉

擺低行李就直接出去心齋橋食Eggs&Things

好好味啊!!!

雖然唔知點解只不過係pancake加一大pat cream

但就係好好味!

食完夜已深

我地就行返番酒店浸溫泉了